أولاد البطة السودا
زي كل يوم الصبح.. أخد دعبس أفندي الشنطة، ونزل علشان يشتري العيش، وكالعادة، وزي كل المصريين.. ماشي يكلم نفسه،
الصبر من عندك يا رب.. كل يوم على دا الحال، نصحى في الفجر علشان نلحق دور في طابور العيش، نتلطع تلات أربع ساعات وأول ما الفرن يشتغل يبقى الطابور في خبر كان.. لكن هانعمل إيه؟؟ أدينا عايشين زي الحمير اللي بتاكل في النجيل.. لا النجيل بيخلص ولا الحمير بتشبع.. لا وفالحين بس يقولوا ............
- صبح .. صبح يا دعبس أفندي
- يا سلام ع الفال.. يا سلام عليك يا سي ناموس.. فايق وبتهزر ع الصبح.
- طبعاً لازم أكون فايق وأهزر واضحك كمان... مش هانبقى نسايب.. إنما سيبك انت.. كنت ملعلع امبارح في التليفزيون، والباطلوا كان عامل معاك شغل.. إنما يا دعبس أفندي المذيعة بتسألك مين أول رئيس لمصر؟ تقول لها محمد نجيب!!... يطلع مين محمد نجيب ده؟
- ناموس..
- نعم يا دعبس أفندي؟
- امشي من جنبي..... امشي.... من.... جنبي، أنا مش ناقص الضغط يرتفع.
- " ليه بس كده يا عم دعبس.. دا أنا حتى كنت عاوز اسألك عن واحد اسمه نظيف، بيقولوا انه هايلغي الدعم.. وبيقولوا انه راجل كُبارة وكلمته مسموعة.. يطلع مين ده؟؟
- دا بقى يا سيدي عملي وعملك الأسود في الحياة.. جايبينه نضيف علشان ينضف جيوبنا من الملاليم اللي فيها.. عرفت بقى يبقى مين؟؟
- آاااااااااه...... لا.
- ربنا يكون في عونك يا راجيه يا بنتي... هاتتجوزي واحد جاي من كوكب تاني.
- إنما يا دعبس أفندي أنا سمعت إن كان فيه انتخابات في مصر اليومين اللي فاتو.. هى انتخابات مجلس الشعب رجعت تاني؟؟ هما مش كانوا خلوها هى كمان بالواسطة؟؟
- لا يا سيدي دي انتخابات المحليات.
- المخللات ؟!
- يا صبر أيوب.. مخللات إيه يا مالح.. انت عجلاتي ولا طرشجي؟
- بشويش عليا يا دعبس أفندي.. انت عارف ان تعليمي على قدي.. ولا انت غاوي تعايرني.
- ربنا يكون في عونك يا راجيه يا بنتي... هاتتجوزي واحد جاي من كوكب تاني.
- إنما يا دعبس أفندي أنا سمعت إن كان فيه انتخابات في مصر اليومين اللي فاتو.. هى انتخابات مجلس الشعب رجعت تاني؟؟ هما مش كانوا خلوها هى كمان بالواسطة؟؟
- لا يا سيدي دي انتخابات المحليات.
- المخللات ؟!
- يا صبر أيوب.. مخللات إيه يا مالح.. انت عجلاتي ولا طرشجي؟
- بشويش عليا يا دعبس أفندي.. انت عارف ان تعليمي على قدي.. ولا انت غاوي تعايرني.
- يابني تعليم إيه بس.. دي حاجة مفروض تعرفها حتى لو بتبصم.. ولو ليه.. هو انت مش معاك دبلوم؟
- أيوه طبعاً.
- تبقى بتبصم.. حتى لو مخلص جامعة.. تبقى برضه بتبصم.. شوف يا ناموس يا ابني.. كل حاجة في بلدنا دي بالانتخابات إلا حاجة واحدة.
- وهى إيه بقى؟؟
- الانتخابات نفسها.. شوف اللي حصل يا سيدي، وسيد العباد ربنا، إن كان فيه انتخابات الفترة اللي فاتت.. دي بقى انتخابات المحليات.. وطبعاً جنابك مش عارف ايه هى المحليات؟
- لا مش عارف.
- طيب اديني عقلك وامشي حافي.. شوف يا سيدي.. وسيد العباد مين؟؟
- ربنا.
- اسم الله عليك.. ما ترجعش بقى تقولي سيد العباد زيد وعبيد.. اى نعم هم اصحاب الوسية واحنا ولاد البطة السودا وشغالين عندهم بلقمتنا.. بس دا لا يمنع ان سيد العباد.. مين؟؟
- ربنا....... جرا ايه يا دعبس افندي.. ايه الرغي دا كله؟
- رغي في عينك.. اديني بأسلي نفسي عقبال ما نوصل الفرن.. بص يا ناموس.. الوسية اللي اسمها مصر متقسمه لمحافظات والمحافظات متقسمه مراكز وقطاعات ومديريات والمراكز قرى وأحياء.. حلو الكلام.. قوم ايه.. كل مركز من دول بيبقى فيه واحد مسئول يحاسب الحكومة لو غلطت.. واخد لي بالك.. زي عضو مجلس الشعب.. مفروض.. واخد لي بالك برضه.. مفروض انه يحاسب الحكومة لو غلطت.
- طيب مين اللي فرض المفروض ده يا دعبس افندي؟
- قولت لي بقى مين.. دي يا عم ناموس حكاية طويلة.. زمان كان فيه راجل دماغه ضاربة اسمه كارل ماركس.. الراجل ده فكر في تفنينه حلوه سماها الشيوعية، فخد التفنينه دي كام واحد كانوا وقعين على دماغهم وهم صغير، واحد اسمه لينين، وواحد اسمه ستالين، وواحد اسمه تروتسكي. وعملوا منها نظام سموه النظام الاشتراكي.
- ايوه يا عم دعبس ما أنا عارفهم.. مش دول اللي كانوا في روسيا.
- ما شاء الله.. ما شاء الله.. ايه الثقافة اللي حطت عليك مرة واحدة دي؟
- علشان تعرف يا حمايا العزيز ان جوز بنتك مثقف.. وبالأمارة دول اللي اخترعوا البلاط البورسلين.. صح؟؟
- الصبر.. هى يا ربي العيلة ناقصة مجانين.. اسكت يا ناموس الله يهديك.. علشان وصلنا الفرن.
- طيب وبقيت الحكاية؟
- أبقى أكملهالك بعدين يا سيدي.. ايه ده.. الفرن فايق ليه النهاردة؟؟
- أيوه فعلا.. حوالي 18 ألف واحد بس.. هى الناس راحت فين يا دعبس أفندي ؟؟
هناك 13 تعليقًا:
جميل جدا يا مهاجر
درس فالسياسة عالسريع .. على شوية انتقادات وهرجع اقولك تانى لا حياة لمن تنادى ولا نخلى البساط احمدى واقولك زى ما قال زغلول : غطينى وصوتى يا صفية مافيش فايدة !!
مستنية دعبس افندى يكمل دروسه واهو بالمرة هخلى الاوانيس بتوعى يقروه
دمت
اه صحيح يا مهاجر عايزة اقولك انى قريت كتاب مؤخرا لايهاب عبد السلام اسمه ازمة رجالة ياريت تبقى تقراه بصورة او بأخرى اسلوبكم زى بعض !!
تحياتى
بجد يا مهاجر
هناك مدونات ادخلها فأسال نفسي هل سأصل مستواها يوما ما
وهذه المدونة منهم
ننتظر جديدك
محمد كمال
بقى يا حلم هو عمنا سعد قال لخالتنا صفية " غطيني وصوتي ؟؟ "
وأنا بأقول هو بقاله اكتر من 80 سنه في محطة الرمل باصص ناحية البحر ليه ؟؟
اتاريه زهق من البلد ولقى ما فيش .
أما الكتاب فللأسف ما مر عليا والله رغم ان بيتي عامل زي الكتب خانه
مش للقرايه .. لكننا بنحرق الكتب في الشتا علشان ندفا بيها :)
وحقيقي من دواعي سروري انك تجدي شبه بين الخزعبلات بتاعت اخوكِ المهاجر ، وكتابات كاتب معروف
سؤال أخير اذا سمحتِ
انتِ قلتِ " واهو بالمرة هخلى الاوانيس بتوعى يقروه "
يعني ايه الأوانيس ؟؟
الأخ محمد كامل
زيارتك شرفتني
ويا أخي أنا زرت مدونتك ، ومفروض انا اللي اسأل نفسي واتمنى اني اصل لمستواها
ولك التحية
ادى طوابير العيش و لا بلاش يا ترى طابور السيدات اللى جنبكم كان بيناقش ايه؟. المدونة جميلة و اسلوبك ظريف جدا و عميق فى نفس الوقت لازم نشكر الدكتور نظيف لانه خرج المواهب اللى جوانا و بقينا شعب من الساخرين و الفلاسفة مهى دى اخرتها. بس ان شاء الله اخرتهم هتكون قريبةو الله يا اخى انا مش عارفة الناس دى بتنام بالليل ازاى و لا هما عايشين فى كوكب تانى حسبى الله و نعم الوكيل
الاوانيس جمع انسة بس اوعى حد من المجمع اللغوى يسمعنى لتكون العواقب وخيمة
اما عن حكاية انك تحرق الكتب تدفى بيها يا مهاجر فانا لا اظن ولكنى اعتقد ان الكتب خانة اللى عندك بتدفيك من غير ما تحرقها
وارجع ااكدلك وطبعا رأيى متواضع ان اسلوبك جميل وشيق
منياتى لك بالصحة وتحياتى
الأخت جنة
أعتقد والله أعلم ان طابور السيدات ما كان عندهم وقت للمناقشات .. لكنهم كانوا بيصوتوا .. مش في الانتخابات
تصويت عن صويت .. يفرق
شاكر مرورك من قلبي .. ركما قلتِ
حسبنا الله ونعم الوكيل
بقى يا حلم .. أوانيس جمع آنسة
منهم لله مدرسين اللغة العربية
طول عمرهم بيعلموني غلط
شوفي بقى بالنسبة لحكاية الكتب فانا هاعترف لك بسر
احنا مش بنحرقهم .. لكن ماما سوزان قالت القراءة غذاء
فبما مصر مبقاش فيها عيش فالناس سوف تتوجه لأكل الورق في اقرب وقت
والشاطر بقى اللي يقدر يحوش ورق على قد ما يقدر
وأشكرك كتير على المجاملة الرقيقة
تحياتي
حملة مقاطعة المنتجات الهولنديه .. هنا أغلب المنتجات الهولنديه http://salafiana.blogspot.com/2008/04/blog-post.html
أنشروهاااا وأنصرود دينكم وأحتسبوا الأجر ان شاء الله
" المخللات ؟!! "
خذوا الحكمة من فم ناموس
.....تحياتي.......
مرحباً بالسيد هدهد القناص ;)
الذي اقنص من النص كلمة واحدة تساوي النص كاملاً
فعلاً المخللات .. هي الترجمة الحرفية للمحليات
لك التحية من بلاد الملح :)
ايه يا ريس
كل ما أقول كفاية قراية لحد كده الاقي عيني سبقاني على الموضوع اللي تحت
ماما سوزي كان عندها حق
تصدق جعت
18 الف واحد بس بسيطة ياراجل
بوست زي العسل
ابقي خليه يتكلم عن فاتورةالغاز اللي بتكون عشرة جنيه رغم اناستهلاكك 4 جنيه فقط
إرسال تعليق