تجدنا في

الحلقة العاشرة، .. مسروق على باب الجامع

رجع دعبس أفندي البيت بالسلامة، كان تعافى بدنياً، لكن إحساسه بالمرارة لأنه فشل في تربيه بنته كان مؤلم بالنسبه له،.. لكنه ما كان عارف ان هناك مفاجئة سارة منتظراه.
طبعاً بمجرد وصوله البيت اتجمعت شلة قهوة محروس بما فيهم ناموس وأبوه الحاج شلبي، وأخدوا بعضهم هيلا بيلا وراحوا يزوروه، وبالتالي تحول بيته إلى مؤتمر شعبي كل واحد فيه برأي.. ما عدا دعبس أفندي نفسه اللي كان ساكت ومتابع للحوار وشارد في نفس الوقت، وما انتبه إلا لما سأله مسروق صاحب شكروت سؤال غريب..

- ولا انت رأيك ايه يا دعبس أفندي؟
- هه .. رأيي في ايه؟
- لا دا انت مش هنا خالص.. بأقولك ان سبب ازمة البنزين في مصر هو تصدير الغاز لإسرائيل.
- يمكن
- لا مش يمكن.. ده أكيد.. ، يا ربي دا احنا لسه ما خلصناش من أزمة العيش، تطلع لنا أزمة البنزين؟.. وبكره أزمة الكهربا، وبعدها المية والهوا.. علشان تستريح الحكومة اللي ما عندهاش نقطة من الاحمر.. والله ما أنا عارف البلد دي رايحة على فين؟
- شوف يا مسروق يا ابني.. لو شفت عربية كارو ساحبها حمار وسايقها حمار.. هتسأل العربية دي رايحة على فين؟..
- طبعاً لا.
- امال بتسأل ليه دلوقتي؟
- والله معاك حق يا دعبس أفندي.. لا وبعد كل ده يحكموا ويتحكموا فينا بقانون الطوارىء.. مش مكفيهم انهم باعوا كل حاجة.. يا راجل دا حتى آثار البلد باعوها.. بكره بدل مصر للطيران هتلاقيها ديفيد للطيران، وبدل سكك حديد مصر هتلاقيها سكك حديد بنيامين... ومش بعيد تلاقي واحد يهودي داخل شقتك ويقولك شلوم.. انا شريكك في الشقة.

- يا جماعة أنا رأيي ان البلد محتاجة ثورة تصحيح زي الله عملها السادات رحمة الله عليه.
- اتفضل يا عم دعبس.. خد عندك، شوف احنا بنقول ايه، والحاج شلبي بيقول ايه.. تصحيح ايه بس، البلد دي عاوزه جمال عبد الناصر تاني.. هو اللي يبص للحال المايل ده يعدله.
- جمال ايه يا اخويا.. جمال بتاعك ده هو اللي ودانا في داهية.. وضيع أجدع رجالة شوية في اليمن، وشوية في الجزاير، والباقي في النكسة.
- وهو يعني السادات اللي ملاك يا حاج شلبي.. ماهو حط ايده في ايد اللي قتلوا اولاده زي ما كان بيقول.. وأخرته كان سوده مخططه بكحلي زي عمله.. ولا ايه رأيك يا ناموس؟.. ما تقول حاجة لأبوك اللي غرقان في مية البطيخ.

- يا استاذ مسروق.. هو لا جمال، ولا السادات.. البلد فيها اللي مكفيها، وربنا يديم علينا الرئيس الحالي ويمد في عمره كمان وكمان.. ويقصف أعمارنا احنا يا شيخ علشان جنابك تستريح.. وأبويا يستريح.. ويلا بينا بقى علشان دعبس افندي هو كمان لسه خارج من المستشفى وعاوز يستريح.
- أي والله معاك حق.. احنا نسينا نفسنا خالص، ألف حمد الله على السلامة يا عم دعبس
- الله يسلمك يا مسروق يا ابني.. لكن قبل ما تمشي أنا لي عندك طلب.
- أامرني يا عم دعبس.
- سيبك يا ابني من السياسة اللي بقت عاملة زي الفيديو كليب الهابط، والتفت لدروسك.. انت وشكروت خلاص على وش تخرج.. وبعدين قبل ما تفكر في السياسة؛ اعرف الأول مين اللي سرقك.. يا مسروق.
- يا عم دعبس يعني هانتخرج هانعدل المايل يعني.. ادينا بنزود العدد في الفول.. وكل فولة ولها كيال.. والكيال محتاج شيال.. والشيال مشغول البال.. حتى البال شارد في اللقمة.. واللقمة وقعت في البير.. وأكلها راجل خنزير.. كان فاكر ابنه زقزوق.. طلع ابنه يا ولداه مسروق.. هههههه... ويجعله عامر.

------

وخرج زوار دعبس أفندي.. وفضل لوحده فارد جسمه على السرير ومبحلق في السقف، وحالة الشرود مسيطرة عليه... لغاية ما دخلت عليه الكتكوتة الأمورة سبب المصيبة كلها راجية.. وقالت:

- بابا.. أنا آسفة.. مش عارفة أنا عملت كده ازاي.
- الظاهر يا بنتي ان زمانكم هو اللي كده، وأنا اللي حابس نفسي في تابوت من القيم والمباديء والأخلاق اللي عفى عليها الزمن.. الظاهر ان الجواز العرفي والمسيار والطيار والمحتار هو قانون الزمن ده.
- لكن أنا ما اتجوزتش عرفي.. انا كدبت، مستحيل يا بابا تكون التربية اللي ربتنا عليها غلط.. انا بس ندمانة اني اضطريت أكدب وأقول اني متجوزه عرفي، حتى الورقة اللي شفتها انا اللي كتبتها لأنه كان صعب عليا اتجوز ناموس العجلاتي.. واقضي حياتي زي عفاف.. انا آسفة يا بابا.
- بابا.. الله يخرب بيت أبوكِ

وابتسم دعبس افندي.. أخيراً ابتسم لأنها كنت مفاجئة سارة جداً له.. وقبل ما ياخدها في حضنه.. اتهز البيت كله بسبب صوت فرقعة شديد..

الحلقة التاسعة، .. فقر دم

فضل دعبس افندي في الغيبوبة قد ايه؟ وفاق امتى؟ برضه الله اعلم، لكن بعد فترة من وجود بالمستشفى استرد صحته،
وبدأ يفكر بينه وبين نفسه.......

شكلها هى دي القشة اللي كسرت ضهر البيعير يا دعبس.. هى دي اخرت تربيتي يا ربي، أنا بس غلط في ايه، قالوا حرية ادينى لهم الحرية وأدي أخرتها.. مرمي في عنبر في مستشفى عام عاملة زي اسطبل الخيل.. لا والدكاترة بيقولوا الغيبوبة كانت بسبب فقر الدم.. حتى الدم يا ربي وصل له الفقر.. يعني بعد كده مش هايبقى عندنا دم كمان..

- ازيك دلوقتي يا دعبس افندي؟

- الحمد لله.. ازي صحتك انت يا عم فانوس؟

- نشكر الرب.

مسكين.. من يوم ما وصلت المستشفى ما شفتش حد جه سأل عنه.. الظاهر انه مقطوع من شجرة،

- مالك يا دعبس افندي.. شايل هموم الدنيا فوق دماغك ليه؟.. يا راجل ارمي حمولك على اللي خلقك

- ونعم بالله.. لكن والله الكيل طفح يا عم فانوس.. كل حاجة أصبحت تجيب الضغط.. شايف حتى المستشفى شكلها ايه، عاملة زي مقلب الزبالة ولا مؤخذة

- وليه لا مؤخذة.. هى دي الحقيقة، الدنيا ما بقاش فيها خير.. تعرف يا دعبس أفندي اول امبارح رحت اشتري فرخة مشوية لقيت فيها عضم.

- !!!!!!!!!!!!!!!!!!!

- ما تستغربس.. طيب اقولك على الأغرب علشان تعرف الغش وصل لحد فين، عارف النهاردة اشتريت علبة سجاير لقتها 20 سيجارة.. تخيل، فين زمان أيام ما كان الجنيه بيتفك خمس اربع.

- ههههههه

- ايوه كده يا راجل اضحك وارمي حمولك على الله، بس تعرف يا دعبس افندي.. البلد دي اتغيرت، انا من يوم ما جيت للدنيا وانا قبطي، وعمري ما حسيت ان فيه فرق بيني وبين أي حد إلا اليومين دول.. طول عمرنا عايشين سوا جيران واصحاب وحبايب.. ايه اللي اتغير؟ مين اللي كل يوم والتاني يعمل فورتينه.. وأخرتها الدكتور خالد.. شوفت بيعاملني ازاي؟ مع انه يا أخي تلاقيه دبلوم صنايع.

- لا يا عم فانوس انت غلطان.. طيب ما عندك الدكتور مصطفى، راجل مسلم سني ولحيته واصلة لغاية صدره، ومع ذلك انت اكتر واحد فينا بيحبه ويهزر معاه.

- دا لأن الدكتور مصطفى راجل فاهم.. احنا عدونا يا دعبس افندي الجهل والطيبة اللي بتخلينا نصدق أي حاجة تتقال، على كل حال انا هاسيك دلوقتي علشان ولادك جم، وبعد ما يمشوا لازم اخد بطاري منك.. والطاولة موجودة.

ولادي.. والله ما أنا عارف انا اجرمت في حقهم لما كنت السبب انهم يجوا للدنيا، ولا أجرمت في حق نفسي.

- مبروك يا بابا الدكتور كتب لك على خروج... مالك ساكت ليه يا بابا؟!!

- اسمع يا شكروت.. أنا عاوزك تسافر البلد لعمك درديري.

- ليه خير؟؟

- هو عارف، انا كلمته من فترة علشان يبيع حتة الأرض... اختك راجية محتاجة جهاز علشان الفرح في أقرب وقت

- ناموس؟؟

- لا

- امال مين ؟؟

- انت بتسأل كتير ليه؟؟ .. يلا علشان نروح، وبكره الصبح تسافر.

الحلقة الثامنة، .. جواز على ورقة بفرة

كان ناموس مستعجل، لأنه كان بيحب راجية جداً من بعيد لبعيد، ولأنه من جواه كان حاسس بالفرق الكبير اللي بينهم، ما صدق إن دعبس أفندي يوافق.. وفي أقرب وقت أخد أبوه الحاج شلبي وراح يخطب راجية.

ولسوء الحظ كان الحاج شلبي ثورجي قديم، جلسوا كلهم يشوفوا برنامج إخباري على التليفزيون.. وفجأة فقد الحاج شلبي أعصابة وقال:

- يا ولاد الـ........، اقفل يابني التليفزيون ده قبل ما أقوم أكسره.

- هدى نفسك يا حاج شلبي مش كده .

- ما انت سامع بنفسك يا دعبس أفندي.. بقولك اللي عملوا مشاكل في المحلة بلطجية، خلاص الشعب كله عندهم بقوا بلطجية، هم نسيوا اللي حصل في كفر الدوار سنة 94؟.. ولا هو التليفزيون بتعنا مش فالح غير في الكدب.. يقولك ديماً الإرهابي المجنون، والسفاح المعتوه.. هو كل اللي يقول الحق يندق، طيب انت عارف بقى ايه اللي حصل في المحلة.. ولا على ايه ما كله معروف وراح فيها الشاب الغلبان، ويقولوا لك الظابط كان يطلق طلقات عشوائية.. وده من حقه.. وفاضل شوية ويقولوا لك انتم ملكوش تمن وكفاية اننا سايبنكم عايشين.. بلد أبوهم أصلها واحنا ولاد كلب.. ناولني يا بني كباية مية.
- هات كباية مية لعمك يا بيجر.
- ايه يا ناموس.. أبوك ماله متعصب كده ليه.. هو يا ابني جاي يتكلم في جوازة، ولا مرشح نفسه لمجلس الشعب؟

- معلش يا عم دعبس استحمله.. هو عصبي شوية من يوم الضرايب ما حجزت على الورشة.
- ورشة ايه يا ابني.. دا دكان عجلاتي كحيان.
- وهى الحكومة يا عم دعبس بتتشطر غير على الغلبان.
- على رأيك.. المهم اخلص.. خلى أبوك يتكلم في المفيد.

- أحم أحم.. ايه يا حاج شلبي.. عايزين نقول الكلمتين.

- أيوه صحيح.. صلي على النبي يا دعبس أفندي.
- اللهم صلي عليه.
- احنا جايين نخطب بنتكم عفاف لابننا ناموس.
- عفاف ايه يابا.. عفاف اتجوزت السنة اللي فاتت.. تقصد راجية.

- يا بني هو أنا عقلي دفتر.. ها قلت ايه يا دعبس أفندي؟

- والله يا حاج شلبي.. الخيرة فيما اختاره الله.. لكن لازم ناخد رأي البنت الأول زي الشرع ما بيقول..
- شرع ايه يا دعبس أفندي؟ ناموس مفهمني انكم متفقين.. ما تقولي حاجة يا أم ناموس..

- لا لا يا دعبس أفندي ملكش حق.. وهى راجية هتلاقي أحسن من ناموس ابننا فين.. اسم النبي حارسة وصاينة شباب وأدب ومعاه الدبلون، وهو يا اخويا في واحدة لاقية عريس اليومين دول.. حق بطلوا ده واسمعوا ده.

والله باين عليكِ معاكِ حق.. البنات بقوا أكتر من الهم ع القلب.. بكره أبو البنت هو اللي هيدفع المهر.. ولا مهر ايه بقى.. هى البلد بقى فيها فلوس.
- بتقول حاجة يا دعبس افندي؟

- لا ابداً سلمتكِ .. أنا بس باقول نسأل البنت حسب الشرع.. واللي فيه الخير يقدمه ربنا..

- ها يا راجية قلتِ ايه؟.. الناس قاعده بره مستنين كلمتكِ.
- قلت ايه في ايه يا بابا.. عاوز تجوزني لناموس العجلاتي.. مش كفاية جوزت عفاف لسواق تاكسي.
- وماله يا بنتي العجلاتي، أو سواق التاكسي.. الشغل مش عيب.
- لا يا بابا.. في الزمن ده بقى عيب.. صحيح الشهادة مبقاش لها لزمة.. لكن بلدنا لسه بلد شهادات.. ناموس ابن حلال.. لكن بصراحة انا ما أقدرش اتجوزه.
- ليه يا بنتي؟؟ ........ مالك ساكته ليه؟
- يا بابا انت عودتنا على الصراحة.. خد اقرا الورقة دي.

- يا نهار أبوك اسود.. انتِ متجوزه عرفي.. أدي أخرت العلام..
- انا متفقه معاه اننا نتجوز شرعي بمجرد ما نتخرج.. ايه المشكله؟.. دا جواز حلال.
- حلال!!..... الجواز اللي على ورقة بفرة بتسميه حلال.. الظاهر اللي بتعمله الحكومة فينا هو كمان حلال.. والله وطبلت على دماغك من كل ناحية يا دعبس.
- بابا.. بابا... الحقونــــــــــــــــــــــــــــي........

الحلقة السابعة، .. أوصيك يا ولدي، بالمجلس البلدي

نجح دعبس أفندي في مهمته الانتحارية، ورجع من الفرن مجبور الخاطري.. حتى كلام ناموس معاه بعد ما خرجوا سوا كان فيه كتير من الحسد، لأن دعبس أفندي ما شاء الله راجع البيت بـ ...

- ابسط يا عم دعبس.. اديك راجع البيت برغيفين كاملين.. لكن بصراحة شكلك وحش قوي لما تروح بفردة جزمة واحدة، مع انك واقف بره.. وانا اللي مردوم في وسط الزحمه باحدف لك العيش.

- انت يعني شايف حاجة منه وصلتني.. نهايته.. يلا غور شوف وراك يه.
- ماشى كلامك.. سلام يا حمايا العزيز.
- غور جك ديب ياكلك على رأي عمك درديري.

ممممممممممم.. رغيفين.. طب انا أعمل بيكم ايه دلوقتي؟؟.. انشفكم واطحنكم بدرة.. واخلي كل عيل من العيال ياخد شمة،.. ولا احط فيكم سم واكل انا والعيال ونرتاح كلنا من البلد دي؛ بس هاروح فين من ربنا.. طيب.. انا ممكن ابوشكم في ميه هاتنفشوا.. أبوشكم!!.. هو يا ربي بوش ورانا ورانا حتى في رغيف العيش.. لا.. مش نافعة الفكرة دي.. طيب انا ممكن أعملكم حجاب.. برضه لا.. العيال كده مش هياكلوا.. طيب ممكن.....

- لله حسنة قليلة تمنع بلاوي كترة.. لله
- تعالى.. انت جيت في وقتك.. خد رغفين عيش طازة اهم من اللي وصى عليهم داوود في التذكرة.. خلى بالك فيهم واحد محروق.. والتاني تقريباً والله أعلم متاكل مرة قبل كده.. لكن يلا مش خسارة فيك.. مادام قلت لله.. يبقى حسبنا الله ونعم الوكيل.

عليا النعمة شحات لكن ملك.. بكرة يبقى نقيب الشحاتين.. واتحايل عليه علشان يقبلني في النقابة.. لكن في مشكلة صغيرة.. لما شعب مصر كلها يبقوا شحاتين.. مين اللي هايشحتهم؟
- اشي بيك أبو شكروت.. تحتشى مع حالك؟؟
- أهلاً أبو نواف.. زي ما انت شايف باحكي مع حالي.. بأكلم روحي.. والمصيبة ان روحي مش عاجبها الكلام.. الهم كتير يا ابو نواف.. أخوك دعبس بقى عامل زي اللي اترمى في وسط بحر.. ومش شايف لها بر.
- يا راجل انت سابوح.
- اسكت يا ابو نواف.. سابوح مين بس.. دا لو أبو هيف نفسه هايغرق..... قصره.. سلام عليكم.
- وعليكم السلام.. منتظرك بالكافيه
- إن شاء الله..

مش عارف انت سبت العراق ودوناً عن بلاد الدنيا كلها جيت المخروبة دي تعمل ايه؟؟.. أهو أخرتك بياع خضار.. وبكرة تبقى شحات انت كمان.. الله يرحمه صدام كان مخليكم ملوك.. ربنا يتولاكم برحمته ويتولاني معاكم..
ايه ده.. البيت مايل كده ليه؟؟.. الظاهر إن دواهي عندها حق.. البيت فعلا لازم يتنكس.. بس منين.. كده يبفى مفيش فايدة لازم ابيع حتة الأرض اللي في البلد مع اننا عايشين بحسها.. لكن لله الأمر.. بدل البيت ما يقع على العيال.

- انت شرفت.. ما لسه بدري.
- اصطبحنا وصبح الملك لله.. خير يا ام شكروت؟؟
- محصل الكهربا يا خويا.. عاوز 240 جنيه.
- 240 ايه؟؟... ليه؟ هو احنا مشغلين مصنع نسيج... فين ابنك الزفت الصغير بيجر؟
- اخوه شكروت خده يشتري له شراب بدل اللي اتهرى.
- الله يخرب بيت الخصخصة واللي شار بيها.. حتى شركة الكهربا يخصخصوها.. بكرة يخصخصوا الهوا كمان.. وبعدين دا محصل كهربا ولا بياع لبن؟؟ جاي من صباحة ربنا يهبب ايه؟
- وانا هاعرفلك منين.. اهو جاي اهو اسأله.

- صباح الخير يا حاج.
- خير.. يابني هو اللي عايش في البلد دي يشوف خير.. ازاي إيصال الكهربا يوصل 240 جنيه؟
- علشان فيه شهر تصفية متأخر.. وهو ده نظام الشركة الجديدة.
- ههههههه.. هم يبكي وهم يضحك.. عارف يا بني الشركة دي فكرتني بإيه؟
- بإيه ؟
- بالمجلس البلدي.
- وايه المجلس البلدي ده يا حاج؟
- كان زمان فيه راجل الدنيا مرمطته زي حلاتنا كده اسمه بيرم التونسي.. الراجل ده كتب قصيدة قال فيها:

قد أوقع القلب في الأشجانِ والكَمدِ ... هوى حبيبٍ يُسمى المجلس البلدي
أمشي وأكتم أنفاسي مخافة أن ... يعدهـا عامل للمجلسِ البلـدي
ما شرَّد النوم عن جفني القريح سوى ... طيف الخيال ، خيال المجلسِ البلدي
إذا الرغيف أتى ، فالنصف آكله ... والنصف أتركه للمجلس البلدي
وإن جلست فجيبِـي لست أتركه ... خوف اللصوصِ وخوف المجلسِ البلدي
وما كسوت عيالي في الشتاء ولا ... في الصيف إلا كسوت المجلس البلدي
كَــأن أمي بلَّ اللهُ تُربتها ... أوصت فقالت : أخوك المجلس البلدي
أخشى الزواج إذا يوم الزفاف أتى ... أن ينبري لعروسي المجلس البلدي
وربما وهب الرحمن لي ولداً ... في بطنهـا يدعيه المجلس البلدي
وإن أقمت صلاتي قلت مفتتحاً ... اللهُ أكبر باسم المجلـس البلــدي
أستغفر الله حتى في الصلاة غدت ... عبادتي نصفها للمجلـس البلـدي
يا بائع الفجل بالمليـم واحدة ... كم للعيال وكم للمجلسِ البلدي؟

- الله الله.. إيه الجمال ده يا دعبس افندي..
- انت كنت فين يا سي شكروت؟
- كنت فين ايه.. سيبك منى.. ايه الشعر الجميل ده؟
- أمال يا واد.. أبوك كان دودة قراية.. وكنت باكتب شعر كمان.. ربنا يسهل وفي يوم على رواقة أخدك القهوة وأسمعك.. علشان تعرف انكم جيل فاشل.. يلا بسرعة ابعت أخوك بيجر يجيب المفك والكماشة من عند حسن ابن عمك درديري.
- ليه؟؟
- علشان نحلَّ عداد الكهربا.... ونديه للمجلس البلدي..

الحلقة السادسة، .. أولاد البطة السودا

زي كل يوم الصبح.. أخد دعبس أفندي الشنطة، ونزل علشان يشتري العيش، وكالعادة، وزي كل المصريين.. ماشي يكلم نفسه،

الصبر من عندك يا رب.. كل يوم على دا الحال، نصحى في الفجر علشان نلحق دور في طابور العيش، نتلطع تلات أربع ساعات وأول ما الفرن يشتغل يبقى الطابور في خبر كان.. لكن هانعمل إيه؟؟ أدينا عايشين زي الحمير اللي بتاكل في النجيل.. لا النجيل بيخلص ولا الحمير بتشبع.. لا وفالحين بس يقولوا ............

- صبح .. صبح يا دعبس أفندي

- يا سلام ع الفال.. يا سلام عليك يا سي ناموس.. فايق وبتهزر ع الصبح.

- طبعاً لازم أكون فايق وأهزر واضحك كمان... مش هانبقى نسايب.. إنما سيبك انت.. كنت ملعلع امبارح في التليفزيون، والباطلوا كان عامل معاك شغل.. إنما يا دعبس أفندي المذيعة بتسألك مين أول رئيس لمصر؟ تقول لها محمد نجيب!!... يطلع مين محمد نجيب ده؟

- ناموس..

- نعم يا دعبس أفندي؟

- امشي من جنبي..... امشي.... من.... جنبي، أنا مش ناقص الضغط يرتفع.

- " ليه بس كده يا عم دعبس.. دا أنا حتى كنت عاوز اسألك عن واحد اسمه نظيف، بيقولوا انه هايلغي الدعم.. وبيقولوا انه راجل كُبارة وكلمته مسموعة.. يطلع مين ده؟؟

- دا بقى يا سيدي عملي وعملك الأسود في الحياة.. جايبينه نضيف علشان ينضف جيوبنا من الملاليم اللي فيها.. عرفت بقى يبقى مين؟؟

- آاااااااااه...... لا.
- ربنا يكون في عونك يا راجيه يا بنتي... هاتتجوزي واحد جاي من كوكب تاني.
- إنما يا دعبس أفندي أنا سمعت إن كان فيه انتخابات في مصر اليومين اللي فاتو.. هى انتخابات مجلس الشعب رجعت تاني؟؟ هما مش كانوا خلوها هى كمان بالواسطة؟؟
- لا يا سيدي دي انتخابات المحليات.
- المخللات ؟!
- يا صبر أيوب.. مخللات إيه يا مالح.. انت عجلاتي ولا طرشجي؟
- بشويش عليا يا دعبس أفندي.. انت عارف ان تعليمي على قدي.. ولا انت غاوي تعايرني.

- يابني تعليم إيه بس.. دي حاجة مفروض تعرفها حتى لو بتبصم.. ولو ليه.. هو انت مش معاك دبلوم؟

- أيوه طبعاً.

- تبقى بتبصم.. حتى لو مخلص جامعة.. تبقى برضه بتبصم.. شوف يا ناموس يا ابني.. كل حاجة في بلدنا دي بالانتخابات إلا حاجة واحدة.

- وهى إيه بقى؟؟

- الانتخابات نفسها.. شوف اللي حصل يا سيدي، وسيد العباد ربنا، إن كان فيه انتخابات الفترة اللي فاتت.. دي بقى انتخابات المحليات.. وطبعاً جنابك مش عارف ايه هى المحليات؟

- لا مش عارف.

- طيب اديني عقلك وامشي حافي.. شوف يا سيدي.. وسيد العباد مين؟؟

- ربنا.

- اسم الله عليك.. ما ترجعش بقى تقولي سيد العباد زيد وعبيد.. اى نعم هم اصحاب الوسية واحنا ولاد البطة السودا وشغالين عندهم بلقمتنا.. بس دا لا يمنع ان سيد العباد.. مين؟؟

- ربنا....... جرا ايه يا دعبس افندي.. ايه الرغي دا كله؟

- رغي في عينك.. اديني بأسلي نفسي عقبال ما نوصل الفرن.. بص يا ناموس.. الوسية اللي اسمها مصر متقسمه لمحافظات والمحافظات متقسمه مراكز وقطاعات ومديريات والمراكز قرى وأحياء.. حلو الكلام.. قوم ايه.. كل مركز من دول بيبقى فيه واحد مسئول يحاسب الحكومة لو غلطت.. واخد لي بالك.. زي عضو مجلس الشعب.. مفروض.. واخد لي بالك برضه.. مفروض انه يحاسب الحكومة لو غلطت.

- طيب مين اللي فرض المفروض ده يا دعبس افندي؟

- قولت لي بقى مين.. دي يا عم ناموس حكاية طويلة.. زمان كان فيه راجل دماغه ضاربة اسمه كارل ماركس.. الراجل ده فكر في تفنينه حلوه سماها الشيوعية، فخد التفنينه دي كام واحد كانوا وقعين على دماغهم وهم صغير، واحد اسمه لينين، وواحد اسمه ستالين، وواحد اسمه تروتسكي. وعملوا منها نظام سموه النظام الاشتراكي.

- ايوه يا عم دعبس ما أنا عارفهم.. مش دول اللي كانوا في روسيا.

- ما شاء الله.. ما شاء الله.. ايه الثقافة اللي حطت عليك مرة واحدة دي؟

- علشان تعرف يا حمايا العزيز ان جوز بنتك مثقف.. وبالأمارة دول اللي اخترعوا البلاط البورسلين.. صح؟؟

- الصبر.. هى يا ربي العيلة ناقصة مجانين.. اسكت يا ناموس الله يهديك.. علشان وصلنا الفرن.

- طيب وبقيت الحكاية؟

- أبقى أكملهالك بعدين يا سيدي.. ايه ده.. الفرن فايق ليه النهاردة؟؟

- أيوه فعلا.. حوالي 18 ألف واحد بس.. هى الناس راحت فين يا دعبس أفندي ؟؟

الحلقة الخامسة، .. لمونة في بلد قرفانة

في وقت قياسي.. اتقلبت الدنيا على دعبس أفندي اللي وقعت في الحفرة، وجات الحكومة كلها علشان تنقذ المواطن المصري، طبعاً وبلا شك عمنا دعبس كان محظوظ جداً لأن التليفزيون كان بيسجل برنامج مسابقات في الشارع، ولما وقع صاحبنا في الحفرة ترك طاقم التصوير عمله الأساسي وبدأ تصوير الحادث،
ولولا كده كان تم إخراج دعبس أفندي بملايات السراير المربوطة في بعض، أو كانوا ردموا الحفرة عليه، وقالوا ارتحنا من فم، وساهمنا في حل المشكلة السكانية..

كان لمونة بيه عضو المجلس المحلي على رأس الحفرة.. بيوجه سائق الونش اللي مفروض يرخي حبل يرفع بيه دعبس أفندي..

- تعالى يمين شوية.. شمال شوية.. هوووووووب.. ارخي الحبل.. كمان شوية.. كمان شوية.
- مش هاينفع يا ريس.. الحبل فيه عقدة.
- وإيه اللي عقده.. ماهو إهمالكم.
- أنا بأقول يا ريس نتصل يبعتوا لنا ونش تاني.
- اتصرف يا بني آدم.. الراجل هيموت تحت.

- يا عاااااااااااالم يا هوووووووه.. خلصوني.. هاتخنق.
- ما تخافش يا دعبس أفندي.. كلنا حواليك.. ولمونة بيه بنفسه جه علشان يطلعك من الحفرة.. والتليفزيون بيصور........ بس خلى بالك ع البالطوووووووووو.
- الله يحرقك يا ناموس انت والبالطو في ساعة واحدة.. ما الزفت البلطو هو السبب.. هو اللي شبك في سيخ الحديد وخلاني وقعت في الحفرة.
- ما تخفش يا دعبس افندي.. اصبر كلها دقايق ونخرجك.
اديني صابر يا سيدي.. ما هو ولولا التليفزيون بيصور.. ما كنش حد شاف وش مخلوق من الحكومة.

- بتقول حاجة يا دعبس افندي.
- لا ابداً سلامتك يا لمونة بيه.

قال لمونة بيه قال.. دا احنا دفنينه سوا.. حتة صايع ضايع عامل زي طور الله في برسيمه، واتشعبط في الحزب الوطنى.. وبقى لمونة بيه.. عضو المجلس المحلى.. وحلي يا حلي.. جتك نيله وانت شبه دواهي، ولا بناخد منكم غير الكلام، انا بس اللي هيجنني.. الحكومة حفرت الطريق ليه؟؟.. ما كان زي الفل.. ولا هو اشتكى لهم؟
كل يوم والتاني.. احفر ركب مواسير ميه.. وارصف.. وبعدين احفر ركب كبلات التليفون.. وارصف.. وبعدين احفر علشان ندور على ربع جنيه وقع من واحد من العمال.. وبعدين ارصف، وكل مرة ميزانية جديدة من دم الشعب اللي مش لاقي رغيف العيش الحاف.. ويا ريت بيستفيد الطريق من الميزانية.. دي بتكون مليون جنيه.. ييترصف الطريق بربعهم.. والباقي على جيوب ولاد الأفاعي.. واحنا ولاد كلب،
البلد بقت عاملة زي ما تكون وسية أبوهم.. واحنا شغالين عندهم بالسخرة.. يدوني 80 جنيه معاش باليمين، وعاوزين اضعافهم بالشمال.. حاجة تعفرت.

- يا ناس ارحموووووووووني.. بقالي 3 ساعات مزروع في ميه المجاري.

وهى يعني ميه المجاري هتكون اسود من مية الشرب يا دعبس انت كمان.. ما هم الاتنين زي بعض.. يا ريت الحفرة تتهد دلوقتي فوق دماغي.. وارتاح من بلاويهم.. اسبهه لهم مخضرة يخربوها ويقعدوا على تلها.... يا خسارتك يا مصر.

- امسك يا دعبس افندي طرف الحبل
حاضر يا سيدي.. ادينا طالعين.. حتى الموت مش طايلينه.. يا خوفي لتعملوا ضرايب بعد كده عليه.. ولا تبيعونا لطلبة الأبحاث في امريكا واوروبا.
- حمد الله على السلامة يا دعبس افندي.

سلامة .. هو انتم اللي يشفكم يشوف سلامة؟؟
- بتقول حاجة يا دعبس افندي ؟
- لا ابداً يا لمونة بيه.
- على كل حال ابسط يا عم التليفزون كان بيصور عملية الإنقاذ.. وعاوزين يعملوا معاك لقاء.. اوعى نسى تشيد بالمجهودات اللي قامت بيها الحكومة علشان تنفذك.. بعون الله طبعاً.
ايوه يا خويا.. اقتلوا القتيل وامشوا في جنازته.. ما انتم اصلا ولا بتفتكروا ربنا إلا ساعة الغرق أو قدام كميرا التليفزيون.. ربنا ياخدكم ويريحنا منكم... بس انا عارف ان ربنا سبحانه وتعالى يمهل ولا يهمل.. وهايجي يوم ياخد كبيركم أخذة عزيز مقتدر علشان يبقى عبرة زي قارون وفرعون وابي بن خلف.
الأمر لله.. نلبس بقى القناع.. ونروح نقول كلمتين حلوين.. خليني عامل زي البلياتشو بتاع عمنا جاهين..
بليتشو قال ايه بس فايده فنونى ... وتلت وقق مساحيق بيلونونى.. والطبل و الزمامير وكتر الجعير ... اذا جنون زبونى زاد عن جنونى عجبى ...

أي والله عجبي عليك يا بلد قرفانة ..

الحلقة الرابعة، .. في بيتنا ناموس

تاني يوم.. قعد دعبس أفندي في قهوة محروس باشا ينعي حظه القليل في الحياة..

ااااااااااااااااااااايه.. دي أخرتك يا دعبس... قاعد زي كيس الجوافة علي كرسي مهكع وفي قهوة من أيام المماليك، بعد ما كنت موظف محترم قد الدنيا... الله يرحمك يا ابو دعبس.. فضلت تقول لي إن فاتك الميري اتمرغ في ترابه.. ادي ترابه من الشقا والعرق بقى طين وابنك موحول فيه لشوشته، حتى القرشين اللي خدناهم من تحت ضرس الحكومة في الخصخصة ضاع نصهم في جوازة البنت الكبيرة والباقي ضاع هو كمان في مشروع الدواجن.. كانت مستخبيه لنا فين انفلوانزا الطيور دي كمان، ولا هو يا ربي قليل البخت يتكعبل في الصديري.أما الملاليم اللي باخدهم معاش يا دوب تمن كيلو لحمة...... يا خوفي بعد ما باعوا البلد ميلقوش حاجة يبيعوها فيبيعونا عبيد، ودواهي ما بترحمش .. كلمة هات في ديل كلمة هات، وكان يجرى إيه بس لو كنت اتجوزت محاسن....... إاااااااااايه.. منه لله أبوها، قال إيه مش عاجبه الموظف بشهادة دبلوم التجارة، ويبص لي بعين ونص ويقول لي: " يا ابني محاسن شهادتها أعلى منك.. هو مفيش نظر.. وبعدين احنا في زمن الانفتاح.. يعني لازم تفتح دماغك." يلا.. كل واحد بياخد نصيبه.

- صباح الخير يا دعبس أفندي.

- صباح الـ........ نعم يا سيدي.. في حد تاني بيته وقع.

- لا أبدا.. أنا جاي لك في موضوع عائلي.. بصراحة يا دعبس افندي أنا طالب القرب منك.

- في مين؟.. دواهي.. أنا موافق.

- الله يحظك يا عم دعبس.. أنا طالب القرب منك في بنتك الآنسه راجية.

- ودا اقول له إيه ع الصبح.. يا ابني.. يا حبيبي انت وقعت علي دماغك وانت صغير.. انت صنايعي.. بالعافية معاك دبلوم، وراجية قدمها سنتين وتتخرج من كلية الزراعة وتبقى باشمهندسة قد الدنيا.. وبعدين انت اسمك ناموس.. يا راجل بذمتك لو عندك بنت ترضى انها تتجوز واحد اسمه ناموس.. ناموس....... يلا هش.. هشششش.

- جرا إيه يا دعبس أفندي.. انت فاكرها بلد بتاعت شهادات، اطلع انت بس من التابوت اللي دافن نفسك فيه.. وبعدين أنا راجل صنايعي وكسيب.. وانت عارف ان ناموس دي شهرة علشان امي ولدتني علي كوبري الناموس.

- شهرة منيلة.. غور من وشي.

عالم غريبة فعلاً.. أكيد ناوي يتجوز البنت في شقة دور أرضي علشان المجاري، طبعاً ما هو ناموس هيعيش فين..

إيه ده.. أيه اللمة اللي هناك دي؟.. لما انادي على صبي القهوة أعرف منه إيه الحكاية..

- خد يا زقلط.. إيه اللمة دي؟

- دا التليفزيون بيصور يا دعبس أفندي.

حلو.. جت لك علي الطبطاب يا دعبس.. يمكن يكون برنامج مسابقات تطلع لك منه بقرشين.. أو برنامج من اللي بيتكلموا فيه عن مشاكل الناس.. أهو يمكن صوتك يوصل للمسؤولين.. بس القميص ده من مخلفات الحرب العالمية.. إيه العمل؟...... بس لقيتها..

- يا ناموس.. تعالى أنا عوزك.

الأمر لله وحده.. أجوزه البنت بدل ما تقعد في قرابيزي.. مع إن ضهري لسه مكسور من جوازة الكبيرة.

- نعم يا دعبس أفندي..

- باقولك ايه.. هات البلطو اللي انت لابسه ده.

- إيه؟!!

- هات يا اخي ما تخفش هارجعه لك تاني..

أيوه كده.. نروح بقي بالقيافة دي نقف قدام الكميرا واللي يعمله ربنا هو اللي يكون ......

- حاسب يا دعبس افندي.

- آااااااااااااااااااااه ... الحقوووووووووووووووووووووني..

الحلقة الثالثة، .. تحت الضرس فص

كان يبدو أنها اتطربقت على دماغ دعبس أفندي، لأن المفاجئة اللي كانت منتظراه أن زوجته الحبيبة دواهي كانت صاحية، وبالتاتي أخد له كام ضربة شبه قاضية بالمقشة..
ولما انتبهت دواهي إلى أن التعوس اللي هى نازله فيه ضرب ده يبقى جوزها، أوقفت إطلاق النار.. فقال دعبس أفندي:

- يا ولية حرام عليكِ.. في واحدة في الدنيا تستنى جوزها ورا الباب بالمقشة؟
- يا خويا... أنا افتكرتك حرامي.. داخل تتسحب زي الفيران.
- يا ولية والحرامي هايدخل عندنا يهبب ايه؟.. دا حتى يطلع مديون.
- ما هو كله منك.. لما كنت ................. يا لهوىىىىىىىىىىي.. حرقت البدلة الجديدة يا دعبس افندي.. صوتي يا اللي ما انتش غرمانة.
أخ............ جالك الموت يا تارك الصلاة...
- نصيبها بقى يا ام شكروت.
- نصيب اسود ومهبب.. بقى يا راجل تاخد فلوس الجمعية تصرفها على نفسك.. اشي بدلة جديدة وجزمة جديدة ونضارة وبرفانات.. ولا اللي شايف له شوفة.
الصبر يا رب.. ادي موشح كل يوم ابتدى، مش كفاية الفص اللي تحت ضرسي منها.. ولاّ ضرس ايه.. ما وقعت الضروس من اللطم يا دعبس.. قال شوفه جديدة قال.. هو اللي يشوفك مرة.. يفكر في صنف الحريم تاني.
- انت بتبرطم بتقول ايه؟؟
- ما باقولش حاجة.. ممكن بقى تسيبيني علشان تعبان وعاوز انام ؟
- نام.. نام يا خويا ومدد رجليك.. هو انت فالح غير في كده.. قال برة وجوه فرشت لك وانت مايل ايه يعدلك.
- يا ولية ارحميني.. هتصحي الواد الصغير.
- هو انت دريان بحاجة.. مش فالح غير في قاعدة القهاوي.. كيلو السكر بقى بأربعة جنية، والطماطم بسته جنيه، واللحمة بأربعين جنية، والعيش والبسلة والبطاطس....
- مبسوطة.. اهو الواد صحي.
- يصحى علشان يشوف خيبة ابوه اللي عايش في مية البطيخ.
- يا ولية وانا هاعمل ايه بس.. البلد كلها مديونة.
- دور لك على شغلانة بدل ما انت معتمد على الملاليم اللي الحكومة بتديهم لك معاش.. شوف لنا حل في مشكلة البيت اللي مسنود بعود كبريت وعاوز يتنكس.. ولا انت مستنيه لما يقع فوق دمغنا؟
- حاضر يا ستي.. ممكن بقى تسيبيني أنام؟
- استنى قبل ما تنام.. ابنك شكروت كان عوزك.
- عاوز ايه سي زفت هو التاني؟.. ما هي اصلها ليلة مش فايته.
- يا خويا وكمان لك عين تتكلم.. قال على رأي المثل.. أقرع ونزهي.. انا رايحة أندهلك الواد.
جت لك على الوجيعة يا دعبس.. صحيح صدق اللي قال: من لا يملك قوته لا يملك حريته، بس هو انا هاعمل ايه يا ربي.. هاضرب الأرض تطلع فلوس.
- مساء الخير يا بابا.
- مساء الخير يا سي شكروت.. نعم يا سيدي؟
- الكلية عندنا عاملة رحلة لتوشكا.. وأنا محتاج 500 جنيه علشان اروح الرحلة وأخلص مشروع التخرج.
- يا ابني حرام عليك.. جبتوا لي الضغط والسكر والدوالي.. عاوزيني اتشل.. هو انت علشان في كلية الزراعة لازم تعمل مشروع التخرج من توشكا.. انت يابني مجنون.. مش عارف ان توشكا دي كانت ضرب على القفا، ولعبة علشان خاطر عيون الحرامية.. كل واحد منهم يشتري كام الف فدان فيها بتراب الفلوس ياخد بضمانها قرض كام مليون من البنك ويخلع ويطلع لسانه للحكومة ويقول لهم الصحرا بتاعتكم عندكم اشبعوا بيها.. انت يا بني مش عارف ان توشكا دي لا تنفع في زراعة ولا صناعة. - جرا ايه يا راجل.. انت هاتعرف اكتر من الحكومة.. اتصرف للواد في الفلوس ولا عاوزه يسقط؟!
- يوووووووووووووه.. انا سايب لكم البيت كله وماشي.
- رايح فين يا راجل ؟
- رايح ارمي نفسي في المالح.
- يا راجل ارجع هدومك هاتتبهدل.. وكيس المسحوق بقى بالشيء الفلاني.
---------
ملحوظة : صاحب فكرة هذه الحلقة صديق عزيز.

الحلقة الثانية، .. أنا ودواهي وساعات الصفا

اضطر دعبس أفندي أنه يتأخر كتير، علشان يضمن انه يرجع في وقت تكون زوجته وأولاده نايمين.
طبعاً بعد البدلة الجديدة ما اتحرقت،
فتح الباب بهدوء.. ودخل يتسحب....

حلو.. البيت هس هس، المهم تكون دواهي نايمة، نامت عليها حيطة بحق قادر مقتدر.
طول اليوم هات.. هات، تقولش أبو دعبس جاب دعبس للدنيا علشان يشتغل عندهم مرمطون، آه لو شافت البدلة اللي اتحرقت، ولاّ الجزمة اللي اتقطعت.. قال دواهي قال.. الله يرحمك يا سي السيد.. ياللي اتقهرنا من بعدك،
فين أول ما اتجوزنا وفين دلوقتي.. كانت عاملة زي العروسة الحلاوة، أحمر واخضر واصفر وحاضر يا سي دعبس.. أوامرك يا سي دعبس.
بس أنا الغلطان.. اصل الستات دول جنس ملعون.. لازم يتحكم بالحديد والنار، ويقولوا قال حرية المرأة... بلا نيلة، الواحدة من دول تبقى هتموت وتتجوز.. تعقد تتدحلب تتدحلب ولما يطب الزبون يبقى يا ولداه زي الفار اللي وقع في مصيدة، مهر وشبكة وشقة وعفريت أزرق كأنهم لقوا كنز.
ومنين يجيب الغلبان.. طبعاً لازم يطفش، ويرجعوا يصدعوا دمغنا بمشكلة العنوسة، حاجة تجن الجن .. وتعفرت العفريت
وإيه الكتب دي؟؟.. أكيد بتوع الواد شكروت.. عاملي فيها مثقف..
الثورة الدائمة.. لينين والثورة في الشرق.. الاشتراكية الحديثة .
الواد فاكر نفسه جيفارا.. وهو بالعافية يعرف الفرق بين الألف وعمود النور، مش فالح بس غير في قلب دمغنا بالأغاني اللي عاملة زي صوت مواتير شركة الحديد والصلب، لا والأكادة إن كلهم شبه بعض وكتير... بقي المطربين أكتر من السميعة، ويقعد الواد يسمعهم كأنه بيسمع أم كلثوم يا خي.

وإيه الكتاب ده.. الثقافة الجنسية ؟؟!!
يا ابن ستين كلب..
ولا ليه، ما هو كتر خيره.. طول الليل والنهار قلبين دمغنا بالثقافة الجنسية في التليفزيون والصحافة والكتب، عوزين يخلوها حاجة عادية.. وهو ده التمدن والحضارة، ويا كده يا نبقى متخلفين..
آه طبعا لابد من محو الأمية الجنسية، وكأنهم محو أمية 49% من الشعب.. والباقي متعلمين نص كوم، الواحد من دول يتخرج من الجامعة حامل شهادة عليا ولو سألته مين اللي فتح مصر يقولك أبو تريكة.
الله يرحم زمان.. كان الواحد وشه بيحمر لما يسمع كلمة جنس، دلوقتى بقت عاملة زي اللبانة، وعادي جداً لما نتكلم فيها أمال.. بلاش تخلف يا راجل.. لا حياء في العلم.
طيب يتشطروا علي العلم اللي بجد، ولا هم عوزين يعملوا زي أهل بغداد يقتلوا الحسين وبعدين يسألوا عن دم البرغوت إذا كان ينقض الوضوء.. عالم غريبة فعلاً.
بس سيبك انت.. دلوقتي ادخل اتسحب من غير دواهي ما تحس، بدل ما تبقى ليلة مش فايته،
- أي ... آااااااااااااااااااااااااااااااااه ...

الحلقة الأولى، .. رائحة شياط في قهوة النشاط

على باب مقهى محروس باشا، وقف دعبس أفندي،
وقف كتير .. أو قليل الله أعلم، لكنه بدأ يفكر بينه وبين نفسه ...

كل شيء تمام .. الجرنال، والبدلة اللي اشترتها من سوق الكانتو لايقة عليا تمام، والنضارة.. لازم طبعاً علشان يقولوا عليا مثقف،.. ندخل بقى ونتوكل علي الله ..
- آي .. يا ساتر، ايه العتبة العالية دي ؟
أستغفر الله العظيم، وادي الجزمة اتقطعت.. وبعدين؟.. مش مهم، ماحدش أخد باله.
ايه الحريم اللي بيرغوا دول؟.. ما علينا أقعد بقى هنا علشان يكونوا في ضهري ويقولوا عليا الواد التقيل.. بس بيرغوا في ايه؟ وإيه ريحة الشياط دي ؟.. أنا أرمي وداني عندهم ونشوف
- بتتسنط على ايه يا بارد ؟
اخص على كده.. لو جردل ميه متلج واندلق فوق دماغي كان بقى أهون، خليني مع الجماعة التانية دي
- الحكومة لابد أن تفعل شيء لمواجهة هذا الغلاء.
يا ليلة سودا.. دول بيتكلموا في السياسة، خليني بعيد أحسن، بدل ما يجي حبايبنا يخدوا عاطل بباطل.

- تشرب إيه يا استاذ ؟
يا سلام.. عرف إني استاذ.. البدلة عاملة شغل، لما اكلمه بقى بالنحوي.. ولا بلاش ليقول عليا هربان من الخانكة
- هات لي يا ابني قهوة مظبوط.
يا سلام.. الراجل زمانه بيقول عليا دكتور مش استاذ.

حاجة غريبة.. فيه ريحة شياط..
ما علينا لما انادي علي الراجل اللي جنب التليفزيون
- لو سمحت هات قناة الجزيرة.
ايوه كده.. دلوقتى يقولوا عليك يا واد يا دعبس متابع الأخبار، ومش عايش على هامش الدنيا،
نطلع بقي الموبايل.. أما الواد عباس فون ده ولد.. حط لي الموبايل التلاته تلتوميه في جراب خلاه من بعيد عامل زي الإن سبعين.. الواد دا دماغه متكلفة.
- اتفضل القهوة يا باشا.
الله الله.. باشا كمان.... الموبايل عمل شغل، بس أنا هاموت وأعرف ريحة الشياط دي جيه منين؟
يا ساتر.. القهوة مرة كدا ليه ؟؟
مش مهم كل المثقفين بيشربوها كده، اجمد يا دعبس واشرب.. وافرد الجرنال بتاع الاسبوع اللي فات،
يلا كبر دماغك.. هو في حد شايف التاريخ
الحب هو.. أن تعامل زوجتك كأنك تعامل بياع الروبابيكيا
يا سلام علي الحكم.. الله يرحمك يا عم صلاح يا جاهين ويرحم قهوة النشاط.
- تلمع يا استاذ؟؟
أي والله جيت في وقتك... الجزمة عاوزلها كيلو ورنيش
- لمع يا ابني... بس فرده واحدة... ايه بتبص لي كده ليه؟.. اعمل اللي باقولك عليه.
حمار مش فاهم.. كده لما ارجع لأم العيال واقولها الجزمة اتبدلت في الجامع تصدق وتقول عليا راجل متقي عارف ربنا.. وترحمني من الموشح بتاع الجزمة اللي اتقطعت.
ايوه.. ريحة الشياط جاية من ورايا.. لما ابص كده
يا سبحان الله.. الحريم بتشرب شيشة... طبعا علشان يقولوا عليهم عايشين في عصر الحرية، بس دي مش ريحة دخان الشيشة.. يا ناس دى ريحة شياط..
- الحق يا دعبس افندي..
يا ساتر.. ودا ايه اللي جابه دلوقتي.. وعرف مكاني منين؟، مش كفاية وشه في وشي طول اليوم.
- نعم يا سيدي ؟
- الحق يا دعبس افندي.. البيت اللي علي قمة شارعكم وقع.
- ايه ؟.. وبيتنا؟
- لا بيتكم سليم.
- الله يحرقك.. ومادام بيتنا سليم انا مالي ومال بيت الناس التانية.
- جرا ايه يا دعبس افندي.. دول جيرانك، هو فيش انسانية؟
- غور من وشي... انسانية في عينك.. لا يا سيدي مفيش.. بح خلاص.
ناس غريبة فعلا.

ايه ده؟.. ايه السخونة اللي في ضهري دي..
يا ليلة مش فايته.. البدلة اتحرقت
- ايه يا ناس ياللي في القهوة.. مفيش انسانية.. مفيش حد ينبهني لنار الشيشة اللي طالت البدلة.. وأنا باقول ريحة الشياط دي منين؟!

ودي هقول فيها ايه بقى لأم العيال؟.. والله ونمت علي السلم يا دعبس أفندي..