الحلقة الحادية عشرة

حزب الله ونعم الوكيل

وفاتت سنين، سنين كتير أو قليل؟ الله أعلم، واتغيرت حاجات كتير، اتغيرت حتى خريطة العالم. وقامت الثورة.. في تونس، في مصر، في سوريا، في اليمن، حتى أمريكا نفسها اتأثرت برياح التغيير اللي هبت من الشرق الأوسط ضد النظم الشمولية، والعبودية اللي كانت هى السمة الواسمة لنظم الحكم في بلادنا العربية.
حتى المبادئ والأفكار اتغيرت، النفوس كمان اتغيرت، الوشوش اتغيرت، وبرغم نسيم الحرية اللي أصبح المصريين كلهم بيتنفسوه، إلا إن شخص واحد كان شايف المشهد وكأنه مسرحية هزلية، شخص واحد الظاهر إن رياح التغيير وصلت لغاية عنده وغيرت مسارها، شخص واحد لسه حاسس بإن كل شيء حواليه ما اتغيرش، الشخص ده هو دعبس أفندي اللي كان قاعد في العصاري سرحان وعنيه متعلقة على يافطة مرشح لمجلس الشعب. سرحان لدرجة إنه كان أشبه بجزء من الكرسي الخشب القديم في قهوة محروس واللي قعد عليه وريحة الشياط خارجة من جواه، وكالعادة شايل هموم الدنيا فوق دماغه، وبيفكر بينه وبين نفسه ..

-    بقت ميغة يا دعبس، نهيبة وكل واحد عاوز يلحق منها حتة، بيت واتخرب والشاطر اللي ياخد منه قالب، الناس اللي كانت فوق المنابر لمدة تلاتين سنة وما فيهم حد قدر يقول كلمة حق، جايين النهاردة يضحكوا على الناس بكلمتين خايبين واسطوانة مشروخة، فاكرنها قصعة فتة، والإخوان اللي من سنة 27 والناس متعلقة في رقبتهم وبيحلموا انهم يعملوا تغيير حقيقي انتظروا لما يشوفوا الكفة هاتميل ناحية الشعب وللا ناحية مبارك، ولما لقوا إن الحكاية جد، وإن الشباب اللي رفعوا أروحهم على كفوفهم مش ناويين يرجعوا إلا ببلد حرة، قالوا يلا بينا نلحق يكون لنا دور في الياغمة، وبعدها نضحك على الناس ونقولهم إننا اللي عملنا الثورة.. وهو يعني حد فاهم حاجة، حطوا الحصان قدام العربية وقالوا مجلس شعب أولاً، طب يا ناس افهموا.. ازاي نبني بيت من غير أثاث؟ يا بشر، با بقر الدستور لازم يكون أولاً، ولا حياة لمن تنادي. لما عمر سليمان قال إن شعب مصر غير مؤهل لإستقبال الديمقراطية هاجت الناس عليه وماجت، مع إنه كان صادق. ديمقراطية إيه بلا وكسة وخيبة بالويبة. وشباب الثورة كمان، قال عاوزين حاكم يكون مطقطق مش رجله والقبر، وعاوزين شاب زي اوباما أوكاميرون، طب دي بلاد بقالها قرون بتمارس الديمقراطية، واحنا يا دوب زي العيل اللي لقى نفسه فجأة بره سريره، عاوز يجري ويجري طب ازاي؟ هو أول ما يشطح ينطح، دا حتى المثل بيقول أول الرقص...
-    حنجلة، .. بتكلم نفسك يا دعبس أفندي؟
-    أهلا يا حاج شلبي، فينك يا راجل.. محدش شافك في الانتخابات
-    انتخابات،، انت بتسمي المسخرة دي انتخابات؟ الظاهر إنه بسبب المنافقين والمنتفعين الجدد هايجي يوم نقول فين أيامك يا مبارك. أدي المجلس العسكري اللي كنا بنقول عليه مننا وحامينا وواقف مع الثورة، أهو بقى صورة بالكربون من الشرطة، يعني من كرباج لكرباج يا قلبي لا تحزن.
-    لكن فيه فرق يا حاج شلبي، أيام مبارك ودولته البوليسية كانت الناس خايفة تنطق، النهاردة جدار الخوف اتهد، ومنتهى الغباء إن المجلس العسكري يفتكر الشعب هايسكت على القتل والتعذيب وحتى تعرية بناتنا في الشوراع وكأنه بيقول لنا انتم شعب نسوان مفيش فيه رجالة.
-    ومنتهى الغباء من الشعب انه يفتكر المجلس هايمشي ويسبهالهم بالساهل، يا دعبس أفندي دي كلها عصابة واحدة، اتربت في مغارة واحدة، يعني باختصار أحمد زي الحاج أحمد، وكل ما تقطع راس هتلاقي راس تانية، والعدد في اللمون.
-    ياريتك افتكرت لنا مليون دولار، أهو لموني بيه جاي علينا وشكله هاينفجر من الغيظ، قوم بينا ناخد ساتر.
-    يا ساتر يا رب، دي حاجة بقت تقهر.
-    مالك يا لموني بيه، روق يا راجل، وسنة جديدة سعيدة إن شاء الله، أطلب لك واحد لمون؟
-    انت بتتريق يا حاج شلبي؟
-    لا والله، بس يا أخي الواحد كل ما يشوف حد منكم سواء كان عضو مجلس محلي زي حلاتك وللا عضو في الحزب الوطني يتنهد بينه وبين نفسه ويقول: إااااااااااااايه .. ولا دايم إلا وجه الله.
-    عجبك كلام الحاج شلبي يا دعبس أفندي، طب انت راجل عاقل وأنا راضي ضميرك، عاجبك اللي بيحصل في البلد، كل يوم مظاهرات واعتصمات وناس عاوزة تولعها وتخربها أكتر ما خربت، بذمتك يا راجل شوية عيال كل يوم والتاني يعملوا فورتينة في البلد ومش عاوزينها تستقر، قالوا عاوزين نخلعوا الراجل اللي كنا عايشين في خيره تلاتين سنة وأديهم خلعوه، عاوزين إيه تاني؟ عاوزين يخلعوا المجلس العسكري؟ ولو خلعوه وجالهم نبي برضه عشان بيقبضوا من أمريكا لازم يخلوها فوضى، اسكت يا راجل دا الواحد هايطق من جنابه، وأخرتها الدنيا تقوم على وراحدة ربنا العالم بيها قال رايحة مظاهرة في عز الشتا وهى لابسة عباية بس وكأنها بتتلكك عشان اول ما حد يشدها تتعرى ويطلع لنا العيال السيس يولعوها،
-    تصدق بالله يا لموني بيه.
-    ونعم بالله يا عم دعبس.
-    فيه صنف من الناس الكلام معاه حرام، تصدق إنك من النوع ده.
-    وأنا اللي بقول عليك راجل عاقل
-    هو انتم خليتوا فينا عقل، يا أخي اختشي على دم أهلك. طبعا مش عاجبك الحال ما هو الميزان لما اتعدل جابكم تحت وقفل حنفية النهيبة اللي كنتم بتنهبوا منها ولا حد بيقولكم سلامات، وطبعا نفسك المجلس السمكري بتاعك يخلد على الكرسي لأنك عارف زي ما هما عارفين إن اللحظة اللي هيسيبوا فيها الحكم هى نفسها اللحظة اللي هتكون فيها رجليهم ورجول اللي زيك في القفص مع شيخ المنصر الكبير، طبعا مش عاجبك حال البلد ولا عجباك طوابير الانتخابات ما انتم كنت مريحين الناس، بتنتخبوا بالنيابة عنهم وهما في بيوتهم جتكم القرف.
-    استنى بس يا دعبس أفندي رايح فين؟
-    رايح في داهية يا حاج شلبي، رايح أشوف حل في ماسورة المية اللي من يوم ما انفجرت من كام سنة وهى خلت الشارع زي مستنقعات السواد، وعلمت الناس الاكروبات لما تنط من حجر لحجر وكأنهم شغالين في سيرك الحلو، رايح أشوف حل في البلد دي، رايح أبدأ بنفسي بدل ما احنا نازلين لوك لوك ومفيش حد عاوز يخلي عنده شوية من الاحمر ويشتغل، وللا أقولك أنا هاعمل حزب سياسي
-    وهتسميه إيه بقى إن شاء الله؟
-    هأسميه حزب الله .. ونعم الوكيل.