رائحة شياط في قهوة النشاط
على باب مقهى محروس باشا، وقف دعبس أفندي، وقف كتير .. أو قليل الله أعلم، لكنه بدأ يفكر بينه وبين نفسه ...
كل شيء تمام .. الجرنال، والبدلة اللي اشترتها من سوق الكانتو لايقة عليا تمام، والنضارة.. لازم طبعاً علشان يقولوا عليا مثقف،.. ندخل بقى ونتوكل علي الله ..
- آي .. يا ساتر، ايه العتبة العالية دي ؟
أستغفر الله العظيم، وادي الجزمة اتقطعت.. وبعدين؟.. مش مهم، ماحدش أخد باله. ايه الحريم اللي بيرغوا دول؟.. ما علينا أقعد بقى هنا علشان يكونوا في ضهري ويقولوا عليا الواد التقيل.. بس بيرغوا في ايه؟ وإيه ريحة الشياط دي ؟.. أنا أرمي وداني عندهم ونشوف
- بتتسنط على ايه يا بارد ؟
اخص على كده.. لو جردل ميه متلج واندلق فوق دماغي كان بقى أهون، خليني مع الجماعة التانية دي
- الحكومة لابد أن تفعل شيء لمواجهة هذا الغلاء.
يا ليلة سودا.. دول بيتكلموا في السياسة، خليني بعيد أحسن، بدل ما يجي حبايبنا يخدوا عاطل بباطل.
- تشرب إيه يا استاذ ؟
يا سلام.. عرف إني استاذ.. البدلة عاملة شغل، لما اكلمه بقى بالنحوي.. ولا بلاش ليقول عليا هربان من الخانكة
- هات لي يا ابني قهوة مظبوط.
يا سلام.. الراجل زمانه بيقول عليا دكتور مش استاذ... حاجة غريبة.. فيه ريحة شياط..
ما علينا لما انادي علي الراجل اللي جنب التليفزيون
- لو سمحت هات قناة الجزيرة.
ايوه كده.. دلوقتى يقولوا عليك يا واد يا دعبس متابع الأخبار، ومش عايش على هامش الدنيا، نطلع بقي الموبايل.. أما الواد عباس فون ده ولد.. حط لي الموبايل التلاته تلتوميه في جراب خلاه من بعيد عامل زي الإن سبعين.. الواد دا دماغه متكلفة.
- اتفضل القهوة يا باشا.
الله الله.. باشا كمان.... الموبايل عمل شغل، بس أنا هاموت وأعرف ريحة الشياط دي جيه منين؟
- يا ساتر.. القهوة مرة كدا ليه ؟؟ مش مهم كل المثقفين بيشربوها كده، اجمد يا دعبس واشرب.. وافرد الجرنال بتاع الاسبوع اللي فات، يلا كبر دماغك.. هو في حد شايف التاريخ... الحب هو.. أن تعامل زوجتك كأنك تعامل بياع الروبابيكيا. يا سلام علي الحكم.. الله يرحمك يا عم صلاح يا جاهين ويرحم قهوة النشاط.
- تلمع يا استاذ؟؟
أي والله جيت في وقتك... الجزمة عاوزلها كيلو ورنيش
- لمع يا ابني... بس فرده واحدة... ايه بتبص لي كده ليه؟.. اعمل اللي باقولك عليه.
حمار مش فاهم.. كده لما ارجع لأم العيال واقولها الجزمة اتبدلت في الجامع تصدق وتقول عليا راجل متقي عارف ربنا.. وترحمني من الموشح بتاع الجزمة اللي اتقطعت. ايوه.. ريحة الشياط جاية من ورايا.. لما ابص كده.. يا سبحان الله.. الحريم بتشرب شيشة... طبعا علشان يقولوا عليهم عايشين في عصر الحرية، بس دي مش ريحة دخان الشيشة.. يا ناس دى ريحة شياط..
- الحق يا دعبس افندي..
يا ساتر.. ودا ايه اللي جابه دلوقتي.. وعرف مكاني منين؟، مش كفاية وشه في وشي طول اليوم.
- نعم يا سيدي ؟
- الحق يا دعبس افندي.. البيت اللي علي قمة شارعكم وقع.
- ايه ؟.. وبيتنا؟
- لا بيتكم سليم.
- الله يحرقك.. ومادام بيتنا سليم انا مالي ومال بيت الناس التانية.
- جرا ايه يا دعبس افندي.. دول جيرانك، هو فيش انسانية؟
- غور من وشي... انسانية في عينك.. لا يا سيدي مفيش.. بح خلاص.
ناس غريبة فعلا. ايه ده؟.. ايه السخونة اللي في ضهري دي.. يا ليلة مش فايته.. البدلة اتحرقت
- ايه يا ناس ياللي في القهوة.. مفيش انسانية.. مفيش حد ينبهني لنار الشيشة اللي طالت البدلة.. وأنا باقول ريحة الشياط دي منين؟!
ودي هقول فيها ايه بقى لأم العيال؟.. والله ونمت علي السلم يا دعبس أفندي..
هناك 9 تعليقات:
كويس انها جات علي البدلة بس
تعيش وتاخد غيرها آدي آخرة رمي الودان
هههههههههه
مشهد فى منتهى الروعه .. طرح بطريقه كوميديا أمر نراه كثير جداا . بجد سلمت تعبيراتك ..
والف الف مبروك على انشاء هذه المدونه والمدونه السياسية الآخرى .. الله يوفقك يارب دايما
ملحوظه : حاولت أن ابعث لك تعليق على الموضوع الذى طرحته فى المدونه السياسيه ولكن لم استطيع الكتابه نهائى فى صندوق التعليق .. وهذا مكا حدث أيضا بآخر خاطرة لك شجرة الليمون . أيضا لم استطع التعليق بسبب صندوق التعليق ..
كل التقدير لحسن تعبيراتك دائما .. :)
والله على رأيك
احسن ما المرارة تتفقع
لكن في واحد مشكلة صغير
ان دعبس افندي ده مخنوق ومرارته مفقوعة وتحت ضرسه خمسين فص وفاضل شوية ويطلع من هدومه .. بس مش قادر يقول للغولة يا غولة عينك حمرا
شرفت ونورت المدونة المتواضعة
يا ضي القمر
الله يبارك فيكِ وعليكِ
وما يحرمنا وجودك ديماً
أما مشكلة صندوق التعليق فهي بتحصل احيانا مع متصفح فايرفوكس
وهى ان مؤشر الكتابة ما بيظهر
لو هى دي المشكلة فحلها انكِ تضغطي في اقصى اعلى يسار الصندوق فيظهر المؤشر
اتمنى ألا تحرمينا هذا التواجد
اسلوبك جميل جدا .. بس ياترى لسة فيه راجل بيخاف من مراته لغاية دلوقتى ؟
تحياتى
مبرررررروووووووك على المولود الجديد
وايه كمان دمه خفيف
حاله من النشاط شكلك مش هتهاجر اليومين دول
بقول احسن
نقعد في القهوة شويه ومتاكده حنسمع العجب
همسه
اه بالنسبه للاخت ضي القمر
ممكن تتضغطي على كلمه اترك تعليقك اعلى الصندوق على اليمين
وايضا عند تاكيد الكلمه اسفل الصندوق على اليمين
همسه
الأخت حلم
في البداية أشكرك على المجاملة
أما حكاية إن في راجل بيخاف من مراته، فطبعاً في رجال كتير بيخافوا من زوجاتهم
مادامت الزوجة قادرة على العمل والكسب فالمثل اللي بيقول ضل راجل ولا ضل حيطة اتغير واصبح
ضل قرش ولا ضل خمسين راجل
تشرفت بمروركِ
اختي الجميلة همسة
الله يبارك فيكِ. بس على فكرة ولمعلوماتكِ الخاصة .. أنا مهاجر ، والمهاجر لما ينتقل من مكان لمكان بياخد كل ممتلكاته معاه.
بمعني ابسط وبيني وبينك .. وما تقوليش لحد .. لا شيء من اللي قرتيه هنا جديد
كلها زي ما بيقول عمنا يحي حقى ( كناسة دكان العطار )
رغم إني نفسي أكتب حاجة جديدة .. لكن منين نجيب الوحي والإلهام
أما عمنا دعبس ده بقى فحكاية حكاية اتمنى انكِ تتبعيها، ولو دخلت السجن بسببه ابقي هاتي لي عيش وحلاوة.
وما دمنا في القهوة .. تشربي إيه ؟
أنا عزمكِ ما تخافيش .
والله العظيم انت راجل زى العسل
هههههههههههههههه
عجبى
إرسال تعليق